Sangeres Chanell van den Bergh is ‘twee tree’ nader aan haar droom

Chanell van den Bergh het onlangs haar splinternuwe enkelsnit, Twee Tree vrygestel.
Dié snit, geskryf deur Chanell en Daniel Po, handel oor die tipiese Engelse gesegde, I’ve got your back – die gevoel in ’n vriendskap of verhouding waar jy weet iemand sal altyd agter jou staan, ongeag wát.

Chanell hoop om met dié country/pop enkelsnit te slaag daarin om die publiek vir ’n paar minute weg te neem uit hul realiteit. “Ek hoop mense sal dit goed ontvang en dat hul sommer sal wil dans wanneer hul dit hoor.”

Die musiekvideo, vervaardig deur VPH Films, is in die Noorde van Pretoria geskiet, want hulle wou graag ’n treinspoor insluit in die tonele. Chanell vertel dat die opname groot pret was en dat alles sommer vanself in plek geval het.

“Ek het nie geweet ek moet daarin dans nie, maar toe die musiek begin en almal sê ek moet dans, toe dans ek maar – en geniet dit,” vertel sy.

Chanell is intussen ook besig met haar volgende enkelsnit wat Oorlog heet. “Ek kan nie wag dat mense dit hoor nie. Ek hoop mense kan vereenselwig met my musiek en dat dit ’n verskil sal maak. Ek dink my musiek is anders en hoop die publiek word ook gevoed deur my musiek soos dit my siel voed.”

Chanell is veral mal oor Nashville se musiek met bekende wêreldklas kunstenaars soos Miranda lambert, Brad Paisley en Carrie Underwood. “Country musiek het altyd ’n storie met regte gevoelens en regte mense agter ’n liedjie. Ek hoop dat veral Afrikaanse vrouens, maar ook mans wat oop is vir musiek en die kwaliteite daarvan, sal aanklank vind by my musiek. Ek dink enigeen met ’n passie vir musiek en wat die waarde daarvan besef, sal dit geniet.”

Sy vertel ook dat sy nog altyd baie passievol oor musiek was en al doenig is in die musiekbedryf vandat sy veertien jaar oud is. “Ek was hoofmeisie van Curro College en my vriende het altyd gesê ek is ’n weirdo. Ek werk tans in die finansiële sektor van ’n telekommunikasie maatskappy, omdat ek dit geniet om met syfers doenig te wees. My gunsteling deel van die dag is wanneer ek van die werk af kom, my honde groet en op my bed kan sit en liedjies skryf.”

Chanell put graag inspirasie uit Theuns Jordaan en Miranda Lambert se musiek. “Ek skryf oor hoe ek voel in elke oomblik. Ek vind maklik inspirasie in die dinge om my,” sê sy.

Hoogtepunte tot dusver sluit in haar rol in die flieks As jy Sing en Trouvoete en die liedjie Little Monster wat sy vir die film Mignon Mossie Van Wyk geskryf het. “Ek hoop om my passie en droom uit te leef en sodoende ’n verskil te maak. Ek skryf self my musiek en wil passievolle musiek lewer en ’n sterk handelsmerk opbou.”

Chanell hoop om mense aan te raak, ’n verskil te maak en ’n voorbeeld te wees met haar musiek, goeie kwaliteit verwerkings, video’s en optredes. “Ek glo om nooit te verander vir ander nie en om nooit op te gee op jou drome nie. Ek hou van lewendige optredes en waardeer die gehoor se terugvoer. Daarom sal elk my gehoor altyd met respek en dankbaarheid behandel.”

Loer hier onder na haar treffer:- Chanell van den Bergh – Twee Tree

Enjoyed this post? Share it!

 

Leave a comment